Saitual, the 7th July, 2026: Vawiin khan Saitual Town Planning & Development Committee chu Prof. Lalnilawma, Hon’ble Minister of State, RD & Admin., DM&R, PHE department leh Tawi bialtu MLA ni bawk, kaihhruaiin thutkhawmna neih a ni, Saitual Master Plan ruahhman mek thlen chin te an enho a ni.
He hunah hian Minister Prof. Lalnilawma chuan thu a sawi a, Saitual Town Planning & Development Committee-in a lo rua hman tawh angin Saitual Master Plan siam tura hma lak chhoh mek zel a ni, a ti a, ruahmanna awm sa rin chhanin ramri te pawh rin fel tawh a ni, a ti. Minister chuan he Action Plan hi kum 2046 tin zawn chunga siam a ni dawn tih sawiin, ram intodelh leh hmasawn ni tura Sawrkar laipui hmalakna Viksit Bharat atan pawha a tangkai ngei a beisei thu a sawi bawk. Minister chuan line department te leh VC te chu he Action plan siam kawngah theih tawp chhuah zel turin a fuih a, Saitual mipuite tan kawng hrang hrangah hmasawnna a thlen ngei a beisei thu a sawi bawk a ni.
Vawiin thutkhawmah hian Pu Lalhruaitluanga Ralte, Asst Director (Town Planning), UD &PA chuan Master Plan chungchang te sawi zauin Town & Country Planning-in zirchianna a neih atanga department hrang hrang data an lakkhawm te a tarlang a, sawihona neih zui a ni bawk. Committee chuan Chief Town Planner chu Saitual Town Planning & Development Committee Member Secretary ni tura rawtna chu a pawm bawk a ni.
Vawiin thutkhawm hi Saitual Town Planning & Development Committee chairperson, Minister Prof. Lalnilawma chuan a kai hruai a, Saitual Town Planning & Development Committee Vice Chairman leh DC, Pu Srinivas Sadi, Saitual SP Pu Vivek Kumar Maurya, Pi Lalhmangaihzuali, Deputy Director (Town Planning) UD & PA bakah Saitual Town Planning & Development Committee member te an tel a ni.
