SAITUALAH DISTRICT LEVEL IMPLEMENTING COMMITTEE(DLIC) ON MISSION SHAKTI, BBBP LEH DISTRICT NUTRITION COMMITTEE THUKHAWM
Dated Saitual the 11th Sept, 2026 : Vawiin khan District Hub for Empowerment Of Women(DHEW),Women and Child Development hnuaiah District Level Implementing Committee on Mission Shakti, Beti Bachao Beti Padhao leh District Nutrition Committee chu Chairperson leh DC ni bawk Pu Srinivas Sadi, IAS kaihhruainain DC Conference Room-ah meeting neih a ni.
Chairperson leh DC ni bawk Pu Srinivas Sadi chuan kalkhawmte hnenah lawmthu sawiin line departmentte thawhhona chu lawmawm a tiin chak zawka theihtawp chhuah zel turin a sawm a, mahni zawn theuhvah chak taka hna thawh a nih theih nan thawhhona tha a pawimawh zia a sawi bawk. Bawrhsap chuan Anganwadi-te pawh a hmunah kal chilhin harsatna an tawh leh dinhmunte enfiah a tum thu a sawi a, Distirct Programme Office sakna tura hmalakna kal mek pawh chak lehzuala hmalak anih theih nan thuneitute hnenah thlen a tum thu kalkhawmte chu a hrilh bawk.
Meeting ah hian Pu V Lalhmingliana, Child Development Project Officer, i/c District Programme Officer & Convener, DLIC(Mission Shakti) leh Pu Lalthansanga Sailo, CDPO, Ngopa ICDS & i/c Phullen ICDS te chuan hmalakna tlangpuite PPT hmangin report an pe a, zawhna awm theite zawhna hun hawn anih bakah sawifiah ngaite sawifiahna hun neih zui a ni. Heng bakah hian department dangte nena thawhhona kawnga hmalaknate sawiho anih bakah Mission Shaksham Anganwadi leh Poshan 2.0 hnuaia nutrition chungchangte thlirho a ni bawk.
Vawiin thutkhawmah hian kumin 2026 FY chhungin Women Help Line 181-ah mi 344 in report an awm thu ngaihthlak a ni a, tin, Sakhi Niwas(Women Working Hostel) building luah mek chu chei bawla, mi 25 tal an awm theih nan hmalakte rel a ni bawk. Tin, Anganwadi lama thawktute chuan harsatna an tawh mek zingah KYC update chungchanga portal-a harsatna an tawhte sawiin, anganwadi bungraw chhe tawh leh thlak ngaite siam thaa hma laksak turin Bawrhsap chu an sawm bawk.
Meeting ah hian Pu Tharun Patnaik Madala, SDO(S), Dr Zothanpari Chhakchhuak, Dy CMO, Saitual District, Pu V Lalhmingliana, CDPO, Mission Shakti, Pu Lalthansanga Sailo, CDPO, Ngopa ICDS & i/c Phullen ICDS , Pi Mary Malsawmkimi, DMC, WCD te bakah line department-te an kal tha hle.
